الحواجب اخوات وليس توأم

بسم الله الرحمن الرحيم

السلام عليكم ورحمة الله وبركاته

الحواجب وما ادراك ما الحواجب !
مهم لكل بنت حابة تهتم بنفسها تعرف شلون ترسم حواجبها
لان الحواجب هي نص جمالك ، شوفي وجهك قبل و بعد رسمك للحواجب ، سبحان الله يفرق مره

بودرة الحواجب
قلم الحواجب

جل الحواجب (الكريمي)

هذا الاشياء اللي سبق استخدمتها لرسم حواجبي

حواجبي من النوع الخفيفة تحتاج تكثيف ومرسومة بالنهاية لكن ببداية الحاجب تحتاج رسم وترتيب

تقريبا مثل كذا

الحمدلله حواجبي مافيها شعر زائد فابداً ما احتاج تشقير 

لو كان عندك شعر زائد في حواجبك احرصي انك تشقرينه او تخفينه بطريقة نظيفة ما تاثر على شكل حواجبك

بداية رسمي لحواجبي كانت قبل خمس سنوات كنت استخدم قلم الحواجب البني من برجوا 

تقدرين ترسمين حواجبك فيه ببعدين تخففين الرسمة بمشط الحواجب 

لكن انا استغنيت عنه بعد ما اكتشفت شي جديد

بودرة الحواجب من ذا بودي شوب الشهيرة 

في منها درجات انا درجتي ٢ 

فيها لون بني غامق (محروق) وبني فاتح

سعرها رخيص ماتذكر كم ؛ لاني من زمان شاريتها 

استخدم البودرة لتعبيئة الفراغات في الحواجب

استخدم اللون الغامق لرسم الحاجب من المنتصف للنهاية ، اما بداية الحاجب استخدم اللون الفاتح

كانت نقله كبيره وتغير جميل بمكياجي وشكلي 

تنفع للبنات الصغار اللي توهم بادين يرسمون حواجبهم
سهلة الاستعمال وتنفع للمتمرسين

وللي حواجبهم خفيفة او حواجبهم كثيفة

تنفع للجميع خاصة للدوام الصباحي بشكل يومي ولا تسبب تساقط لشعر الحاجب وهذي ميزه

 بالنسبة للفرشة اللي جايه معها جداً سيئة!

استخدمي الفرشة المائلة من اي ماركة تفضلين.

^ ^

اما بالنسبة للزواجات انصح بالجل بس لازم تعرفين كيف تستخدمينه عشان تحبينه

حاليا استخدم باليت كنتور كريمي كجل للحواجب من كوستال

اذا انتي حددتي وش نوع المادة اللي بتستخدمينها لحواجبك جل او بودرة في شي مهم بعد!

الشي المهم الثاني :

فرشة رسم الحواجب

 مواصفاتها لازم تكون ثابته ويابسة شوي

مو ناعمة وخفيفة ماتنفع ابد

من زويفا

 اللي على اليمين اسمها Wing liner استخدمها لرسم حواجبي (المفروض تستخدم لرسم eyeliner بس مو لازم اتقيد بكلامهم)
اللي على اليسار اسمها Brow line استخدمها عشان احط إضاءة حدود الحاجب

خطوات رسم الحواجب 
في باليوتيوب والانستقرام مقاطع كثيرة تعلمك كيف ترسمين حاجبك بمليون طريقة
شوفي اللي يريحك وامشي عليه

بالنسبة لي:

اول شيء اخذ كمية من الجل باستخدام فرشة Wing liner واخط خط من الجهة السفلية للحاجب من بداية الحاجب لنهايته
و اسوي الحركة مره ثانية للجهة العلوية للحاجب بس هالمرة ابدا من منتصف الحاجب

اخذ راحتي بتعبئة نهاية الحاجب واتفنن ببداية الحاجب ، شلون؟

ارسم شعره شعره واستخدم كمية قليلة جدا من المنتج

ثم  اخذ كونسيلر درجة افتح من درجتي بدرجة واحط بفرشة Brow line وارسم على جميع حدود الحاجب ما عدا البداية اخليها ثم ادمج الكونسيلر ، هذي الحركة تعطي ترتيب وإضاءة وبروز للحاجب ، لاتفوتكم
 اللمسة الاخير اجيب فرشة تمشيط الحواجب وامشط حواجبي من البداية للنهاية عشان يتوزع المنتج  بشكل متساوي وما احس انه متكتل باي جهة

اخيراً :

 بالنسبة للون الحواجب اختاري لون افتح بدرجة او درجتين من لون شعرك سوا كنتِ صابغة او لا !

مو مهم وش المنتج اللي تستخدمينه لحواجبك المهم هل هو مناسب لك ؟ هل شكلك النهائي جميل ؟


تواصلوا معي :
Twitter | Instagram

2 comments مكياج|Make up